Haedo izan da azkarrena Tirreno Adriatikoko hirugarren etapan

Esprinterren arteko lehia bizia espero zen Tirreno Adriatiko proban, eta aurreikuspenak betetzen ari dira. Herenegun bezala, atzo ere azken zuzengunean erabaki zen etapako irabazlea, eta azken pedal-kolpeetan Juan Jose Haedo izan zen azkarrena (Saxo Bank). Argentinarrak bigarren etapako irabazleari hartu zion aurre, Tyler Farrar estatubatuarrari (Garmin-Cervelo), hain zuzen ere. Farrarrek, hala ere, sailkapen nagusiko lehen postuari eusten dio. Etapari dagokionez, euskal txirrindulari batek bereganatu zuen arreta. Daniel Sesma iruindarrak (Euskaltel) 150 kilometro baino gehiago egin zituen ihesean, baina tropelak harrapatu egin zuen helmugarako 31 kilometro falta zirela. Gaur laugarren etapa jokatuko da, Narni eta Chietiren artekoa, 240 kilometrokoa.