Haislip gabe, baina Loganekin ariko da Baskonia Valentzian

Baskoniak atzean utzi nahi du Moskuko porrota, baina nekez ahaztuko du Errusiara egindako bidaia katramilatsuak utzitako nekea. Arabarrak ostiral goizaldeko lauretan iritsi ziren etxera, eta apenas izan duten astirik gaurko partida prestatzeko. Ostegun iluntzean hartu zuten hegaldia Moskun, Madrilera, eta handik etxera autobusean. Lan saio arin pare bat, eta Valentziarainoko bidaia berriro. Berrikuntza garrantzitsu bat badu, behintzat, Baskoniak: David Logan kantxaratzeko prest egongo da, aste batean hegazkinean 25.000 kilometro egin baditu ere.

Ez da antzekoa gertatuko Marcus Haislipekin. Hilabetea beteko da gaur giharretan mina hartu zuenetik, eta haren osatzea espero baino gehixeago luzatu da. Taldekideekin lanean hasi da, dagoeneko, baina Ivanovicek egoera behartzea saihestu nahi izan du, eta etxean geratu da hegaleko beltzarana. Rancikek ere hobera egin du, eta lunbalgiak eragindako minaren arrastorik ez dauka dagoeneko.

Valentzia ere Euroligan ari da sasoi honetan, eta ostegunean garaipen garrantzitsua lortu zuen etxean Moskuko CSKAren aurka. Ligan daraman bide traketsari buelta ematen lagun diezaiokeen garaipen garrantzitsua. Valentziakoak 1-4 balantzea dute, eta Baskoniaren aurkakoa zirt edo zart egin beharreko partida da. Egiari zor, Valentziak oso egutegi gaiztoa izan du urrian: Bilbo Basket, Bartzelona, Real Madril eta Joventuten aurka jokatu du, eta lauak galdu. Granadaren aurka lortu zuen daukan garaipen bakarra, ligako lehen norgehiagokan.

Orpoz orpo ariko dira ligako bi joko antolatzaile onenetakoak, asistentzia kopuruari dagokionez. Sei baino gehiago ematen dituzte partidako Omar Cookek eta Marcelinho Huertasek, eta haien adimena erabakigarria izango da gaur ere. Valentziak Javtokasen zalantza izango du azken unera arte. Florent Pietrus ari da haren tokia betetzen, hilabete Gasteizen eman zuen jokalari frantziarra.