Arrateko entrenatzailea
«Hasieran puntuak eskuratzea oso garrantzitsua izango da»
1. Denboraldi-aurre nahiko zalapartatsua izan dugu. Fitxaketekin arazoak izan ditugu: Mandic jugoslaviarra ez zen etorri bulegoko arazoengatik eta Vilaniskis lituaniarrak taldea utzi zuen emaztea haurdun duelako. Argentinarrak, aldiz, Panamerikar Jokoetan izan ziren, eta berandu hasi ziren lanean. Hori gutxi balitz bezala, lesioekin ere ez dugu zorterik izan: Fernando, Kobine, Goikoetxea... denboraldi-aurrea nahastu zaigu. Asko falta zaigu egokitzeko eta gabezia horrekin hasiko dugu txapelketa.
2. Sasoi onean gaude, lan ona egin baitugu arlo fisikoan. Taktikoki, aldiz, asko dugu egiteko oraindik: jokalariak euren artean ezagutzea, erasoko eta defentsako sistemak lantzea... Zama txiki hori izango dugu hasieran. Pixka bat atzeratuak iritsiko gara, baina hori ondoen disimulatzen saiatuko gara. Gauzak behin eta berriro lantzeko denbora falta izan zaigu, baina horri buelta ematen saiatuko gara.
3. Bizpahiru multzotan bana daiteke Liga: Goian, txapela irabazteko lau hautagaiak. Gero, datorren urtean Europan jokatu nahi duten lauzpabost taldeak. Eta azkenik, eta ezusterik ezean, zazpi talde jaitsiera saihestu nahian. Badakigu zein den gure tokia. Edonon puntuak eskuratzea izango da gure Liga. Gure aurkari zuzenei irabaztea oso garrantzitsua dela jakin badakigu.
4. Jaitsierako bi postuak saihestea da gure helburua. Hortik aurrera, etor daitekeena ongietorria izango da noski. Mailaz igo ondorengo lehen urtea oso zaila da, desabantaila handiarekin hasten baitzara lanean: jauzi handia mailan, fitxaketak egiteko lan bizia, presaka egindakoa askotan... Prest gaude mailari eusteko gogor borroka egiteko. Hasieran puntuak lortzea oso garrantzitsua izango da, taldeak konfiantza eta segurtasuna hartzeko. Hori egiten badugu, ez gara presaka ibiliko eta partida guztiak ez dira hil edo bizikoak izango. Liga hasieran puntuak lortzen baditugu lasai ibiliko gara.
