Hasteko, Bilbo eta Logroño

Binakako txapelketako finalerdietako ligaxka Bilbon eta Logroñon hasiko da. Bizkaian, Olaizola II.a-Beroizek eta Berasaluze VIII.a-Albisuk jokatuko dute, larunbatean. Adarragan, berriz, igandean, Aspeko bi bikoteek neurtuko dituzte indarrak: Titin-Merino II.ak eta Xala-Laskurainek. Litekeena da pilotaleku horietan jokatzen den finalerdietako partida bakarra ez izatea.

Irujo-Barriola finalerdietarako ez sailkatzea bizkarreko bat izan da enpresen interes ekonomikoentzat, ezaguna baita Iberokoak jendea erakartzeko duen ahalmena. Hala ere, EPELek ligaxka Bilbon hastea erabaki du. Bertan bi partida jokatu beharko dira, gutxienez. Sarrerei dagokienez, garestienek 45 euro balioko dute, eta merkeenek, hirugarren pisuko errebotekoek, hamar. Urrun gelditu dira iazko finalerdietako lehen partidan kantxek izan zuten 150 euroko prezioa. Hura, baina, Bilboko pilotalekuan jokaturiko lehen partida zen, eta izugarri goratu zuen salneurria. Nabarmentzekoa da iazko finalerdietan partida hura bakarrik jokatu zela Bilbon.

Igandekoa Logroñon jokatuko da, eta, Aspek oraindik zehaztu ez dituen arren, salneurriak berak izango dira. Finalerdietakoa Adarragan jokatuko den txapelketako seigarren partida izango da. Guztietan, logikoa denez, Titin III.a eta Merino II.a aritu dira. Iazko binakakoan sei partida jokatuz ziren Logroñon, baina finalerdietako bat ere ez.

Pilota aukeraketei dagokienez, gaur, Bilbon (11:00), eta bihar Logroñon egingo dira (11:30). Etziko greba orokorrerako deialdia dago Hego Euskal Herrian eta Espainian, eta enpresek haren eragina saihestu nahi izan dute.

Titinek galdu egin du (22-18)

Arretxe II.ak eta Beginok 22-18 irabazi zieten atzo Tolosan Titin III.a eta Merino I.ari. Hiru hilabete eta erdiko ligaxka atzo bukatu zen, eta Asegarceko bikoteak hortzak estutu zituen azken postuan ez bukatzeko.Aspeko bikoteak hobeto ekin zion lehiari (12-10), baina Arretxe-Beginok gora egin (13-16) eta hirugarren puntua batu zuen. Asegarceko bikoteak sasoiko bukatu du txapelketa.