Garaipena behar zuen Aimar Olaizolak lau t'erdiko txapelketaren finalaurrekoetan sartzeko, eta ez du hutsik egin. Partidaren gidaritza eramatea kostatu zaio, ordea. Joseba Ezkurdiak ez zuen ezer jokoan —aurreko bi partidak galduak zituen—, baina esana zuen irudi onena ematera zihola, eta hasieran behintzat ez dio partida erosoa utzi aurkariari. Zazpi berdinketa gon dira markagailuan partidaren lehen zatian, eta edozeinek irabaz zezakeela zirudien.
12. tantotik aurrera, ordea, nagusi agertu da Olaizola II.a, sake onekin partidaren norabidea bere aldera eramanez. Sei tantoko tartea irekitzea ere lortu du goizuetarrak (18-12). Ezkurdiak, halere, ez du behin ere etsi, eta markagailuan hurbiltzea lortu du, jarraian hiru tanto eginez (18-15). Olaizolak, baina, aurretik irekitako tarteari eutsi eta are gehiago zabaldu du, bukaeran erakutsiz partidako jokorik onena. Hala, garaipena eta finalaurrekoetarako txartela bereganatu du goizuetarrak. Ekaitz Saralegi izango du aurkari lau t'erdiko txapelketako finalaurrekoan. Beste norgehiagoka Juan Martinez de Irujok eta Oinatz Bengoetxeak jokatuko dute.
