Lehenengo egunetik hainbeste desiatutako etapa garaipena gaur eskuratu du Omega taldeak Frantziako Tourrean, Matteo Trentinen eskutik. Italiako txirrindulariak helmugako argazkiaren beharra izan du irabazi duela egiaztatzeko. Izan ere, hatz punta bategatik nagusitu zaio Peter Sagani (Cannondale), esprintean. Azken hogei kilometroak abiadura bizian egin ditu tropelak, eta esprinter nagusiak atzean geratu dira eguneko malda txikietan. Hortaz, beste txirrindulari batzuk aritu dira garaipenaren lehian. Bazirudien Saganek aukera ugari zuela helmugan bi besoak altxatzeko, baina lehenago indarrak xahutu dituenez, ezin izan du helburua lortu. Trentinek merezita irabazi du, eta, Saganek, berriro ere, bigarren postuarekin konformatu behar izan du. Hirugarren postuan Toni Gallopin (Lotto) sailkatu da.
Azken kilometroetan bizpahiru eroriko izan dira, baina sailkapen nagusian ez da aldaketarik izan, eta Vincenzo Nibali Astanako txirrindulariak jarraitzen du lider. Eguneko kaltetu nagusia Tejay Van Garderen izan da, BMCkoa. Helmugarako hamabost kilometro faltan hankaz gora joan da, Rui Costaren (Movistar) gurpila jo ondoren, eta denbora galdu du azkenean. Hiru taldekideren laguntzaz tropela harrapatzen saiatu da, baina alferrik. Minututik gorako atzerapena izan du.
