Sargori izan zen atzo, eta Behobia-Donostia lasterketan parte hartu zuten korrikalariek ohi baino lan gehiago izan zuten helmugara iristeko. Hiru korrikalari gaur oraindik Donostia Ospitaleko zaintza berezien gunean daude, eta beste bederatzi ere ospitaleratuta daude.
Osakidetzak jakinarazi duenez, larrialdi zerbitzuan 40 korrikalari artatu zituzten, eta horietatik hamabi dira ospitalean jarraitzen dutenak. Egoera larrienean daudenek arazo neurologikoak dituzte, egindako ahaleginaren ondorioz. Zaintza berezien gunetik kanpo ospitaleratuta daudenek ziurrenik senda-agiria bihar jasoko dute.
Larrialdi zerbitzura eraman zituzten 40 horiez gain, beste 330 artatu zituzten ibilbidean bertan DYAk eta Gurutze Gorriak, zorabiatuta, bihurrituekin edo bestelako arazoak jota.
Milaw eta Gebre garaile
20 kilometroko probaren 47. edizioan ez zen atzo eguraldi ona izan lasterka egiteko. Gizonezkoetan Abraham Milaw etiopiarra izan zen irabazlea, 1.02.57ko denborarekin, errekorretik ia lau minutura.
Emakumezkoetan haren herrikide Trihas Gebre garaile, marka eginda: 1.08.07. Aurten 23.400 lagunek eman zuten izena —inoiz baino gehiagok— eta 19.877 atera dira. Sailkapenak.
