Iazko arantza ateratzeko

Aurtengo Banakako Urrezko Aizkolarien Lehiaketa amai dadin bi saio geratzen dira gehienbat: biharko finalerdia eta finala (ekainak 19). Tartean, postuak finkatzeko beste lehiaren bat ere jokatuko da. Donato Larretxeak eta Joxemari Olasagastik jokatuko dute bigarren finalerdia, Aiako probalekuan (Gipuzkoa), bihar (12:30).

Bi aizkolariak ligaxka hasi ziren jokatzen zuzenean, eta biharkoarekin hirugarren saioa jokatuko dute. Beraz, lehiari neurria hartuta plazaratzeko moduan dira. Nolanahi ere, Larretxeak bi asteko atsedenaldia izan du eta Olasagastik batekoa. Aurreko finaleridan bezala, 12 enbor ebaki beharko dituzte. Lehen finalerdian Nazabalek 30 minutu eta 25 segundoan kanporatu zuen Mindegia; aintzat hartzeko denbora.Larretxeak eta Olasagastik iazko finala elkarren aurka jokatu zuten, eta Laretxeak irabazi zuen; Olasagastik ez zuen amaitzerik izan. Geroztik, soilik Euskal Herriko Txapelketa Nagusiko kanporaketan aritu ziren elkarren aurka. Larretxea bigarren izan zen, eta, 2 minutu eta 56 segundoko aldea atera zion Olasagastiri; Igeldokoa ez zen sailkatu finalera.

Larretxeak ongi irabazi ditu aurreko bi saioak

Arrospide eta Mindegiaren aurka nahiko ongi irabazi zuen Larretxeak, eta finalera sartzeko hautagai nagusia zela erakutsi zuen. Olasagastik, aitzitik, ezin izan zuen Nazabalen aurka, batez ere, probako bigarren itzulian. Azurmendiren aurka, berriz, gehiago iraun zuen, eta alde polita atera zion.

Olasagastik motibatuta dagoela esan du:«Handia litzateke Larretxea menderatzea, baina, berez, pozgarria da horren aurka aritzea, galduta ere. Ni motibatuta nago, baina ez da erraza beti gogotsu egotea, hala ere, gure borrokatxoa izango dugu.Nazabalek Mindegia gainditu zuen igandean, eta hau esan zuen biharkoaz: «Larretxea jotzen da faboritotzat, baina erne ibili beharko du Olasagasti ongi ari delako jartzen». Mindegiak ere aitortu zuen Olasagasti «sasoian» dagoela, Larretxea «ongi» ikusten duen arren.