Ikatzaren aldean, turroia nahiago

Oporretara lasai joan ahal izateko gaur Sardinero zelaian irabazteari garrantzi berezia aitortu dio Philippe Montanierrek neurketaren atarikoan. Nork esango zuen halakorik orain hilabete eskas. Baina horrelakoxea da futbola gehienetan, ezin aurreikusi, eta pasatutakoak pasatuta, 2011. urteari modu dotorean agur esateko aukera aparta dauka Realak. Ez da makala.

Ligako hamaikakoari dagokionez, aldaketa gutxi egingo du Montanierrek. Garaiz aurkitu du janzkirik egokiena, eta ez du besterik gabe erantziko. Astearte gauaz geroztik badaki Gorka Elustondoren ordezkoa derrigorrean topatu behar zuela. Espainiako Kopako estreinakoak inorengan aztarnarik utzi badu, Marigarengan utzi du. Beasaindarrak zelaia utzi bezain pronto pauso bat atzera eman zuen kenyarrak, Pardok eta Zurutuzak haren aurretik jokatu baitzuten. Errioxar gaztearen izenaren gainean Aranburu idatziz gero, horra hor gaur Racingen aurka barruko jokoa antolatuko duen hirukoa.

Gainontzean, ez dirudi aldaketarik egingo duenik, nahiz eta Prietoren itzuleraren zirrikitua zabalik uztea komenigarria izan beti. De la Bellak aukeraren bat izan zezakeen, baina zerrendan ez dago haren arrastorik. Joseba Llorenterena ere ez. Diego Ifranek bidaiatu du, eta ligako azkenarekin alderatuz, Jon Ansotegi sartu da bakarrik.

Racing arriskutsua

Racingen etorkizuna irakiten dago aspaldidanik, eta gezurra badirudi ere, zelaiko arazoak ez dira ezer bulegoetakoen aldean. Partidaren aurretik egin beharko dute batzarra, Ali Syed jabea atzo ez baitzen azaldu lehen deialdian. Aulkira begiratuta, Hector Cuperrek dimisioa eman eta gero, Gonzalez-Castaños-Pinillos hirukoteari dagokio sutea itzaltzea. Aurreneko biek badakite zerbait, Muñiz eta Portugalen laguntzaileak izan baitziren. Hirugarrena kapitaina izan da iazko udan erretiroa hartu zuen arte. Oraingoz, jokalariek nortasuna erakutsi dute, Vila-reali irabaziz eta San Mamesen berdinduz. Aurkezpen txartel ona da. Txuri-urdinek erne egon beharko dute.