Irabazi edo irabazi

Ailegatu da denboraldiko unerik erabakigarriena Portland San Antoniorentzat. Asobal Ligako azken jardunaldian, txapela eskura du. Ademar Leonen kontrako partida irabazi beharko du, ordea, txapela jantzi ahal izateko. Joan den asteburuan Liga etxean irabazteko aukerari ihes egiten utzi zioten nafarrek, eta, ondorioz, denboraldiko final nagusi bilakatu da gaurko norgehiagoka.

Ciudad Realen kontrako porrota atzean utzi dute Portlandeko jokalariek asteon. Taldeko entrenatzaile Francisco Javier Zupo Ekisoainek azpimarratu du Ademarren kontrako partida besterik ez dutela buruan. Etxetik at ariko da Portland, eta aurkariak 6.000 zale izanen ditu animatzen. Hala eta guztiz ere, «ontzat» eman du Ekisoainek gaurko norgehiagoka erabakigarria Iruñetik kanpo jokatu behar izatea. «Etxean gehiegi sumatu genuen presioaren zama Ciudad Realen kontrako partidan».Bere bizitzako partidarik «txarrena» egin zuela erran zuen Albert Rocasek joan den larunbateko norgehiagokaren ondoren, hain zuzen ere. Etsita ageri zen. Atzo, Leonerantz (Espainia) abiatu aurretik, bestelako aurpegia zuen. Goizean 09:00etan atera ziren Portlandeko kideak autobusez Leonerantz.

Balic ez da ariko

Autobusean zen Lars Jorgensen danimarkarra. Egin behar zioten ebakuntza atzeratzea erabaki du partida jokatu ahal izateko. Eten diskala du, eta hurrengo asteartera arte atzeratu du ebakuntza egiteko hitzordua.

Ciudad Realen kontrako partidan agerian gelditu zen, hala ere, jokalaria ez dagoela sasoi betean. Ez da % 100ean, halaber, Alberto Martin, atzo autobusean sartu aurretik berriari azaldu zionez. Belauna apur bat minberatua du. Ademarren kontra ariko da, hala ere. Ivano Balicek, berriz, ez du jokatuko, ez baita osatu. Gihar bikian duen zuntz haustura ez zaio oraindik sendatu. Harmailetatik ikusi zuen Ciudad Realen kontrako partida, eta Leonen ere ezin izanen du pista zapaldu.Arazoak bazter utzita, astea lasai joan da Portlandeko jokalarientzat. Ademar Leon mendean hartzeko gai direla uste dute, eta zuzen direla erakusteko irrikan dira. Kasper Hvdit atezainak ederki ezagutzen du Ademar, talde ohia baitu, eta argi eta garbi erran du asteon Portland Leonen Liga irabazteko gai dela. «Ametsa» izanen litzateke jokalariarentzat.Iritzi berekoa da Ekisoain. Palaun Bartzelonari irabazi ziotela gogora ekarri du. Bartzelonan bezala, konfiantza izanen da Leongo partidan gako nagusietako bat. Ciudad Realen kontra beldurrez eta urduri baino urduriago atera ziren jokalari nafarrak pistara. Bestelako jarrera erakutsi beharko dute gaur Leongo pabiloian, irabazi nahi badute behintzat.

Ademar indartsu dago, eta hirugarren postua nahi du

Azken urteotan lehia handiko partidak izan dira Portlanden eta Ademarren artekoak. Berdin aurtengoa. Portlandek Ligako txapela du eskura, baina Leongo jokalarientzat ere funtsezkoak dira jokoan izanen diren puntuak. Irabaziz gero, Asobal Ligako hirugarren postua lortuko luke Ademar Leonek Bartzelonaren aurretik, eta aukera izanen luke hurrengo denboraldian Txapeldunen Ligan aritzeko, Europako Eskubaloi Federazioak lehiaketako atea zabaltzen badio.

Ademarrek, gainera, Europako Errekopa irabazi berri du. Bartzelonaren kontra, halaber, garaipen nabarmena lortu du duela gutxi: 35-27 irabazi zion Leonen. Ademar, beraz, sasoiko dago; joko ona erakutsi du azken jardunaldietan, eta irabazteko grina bizia. Horrek, noski, ez dio Portlandi inolako mesederik egiten. Biharkoa, hala ere, beste partida bat izanen da, eta ordubeteko norgehiagokan gauza asko gerta daiteke.Ekisoainek argi eta garbi erran du noren mugimenduak jarraituko dituzten bere jokalariek, bereziki: Metlicicenak, Kjellingenak eta Juanin Garciarenak, alegia. Ademarren arima eta motorra dira hiru jokalari horiek, neurri handi batean. Motor horren hotsa isilarazten saiatuko dira gaur Portlandeko jokalariak. Eta lortu egin beharko dute Asobal Ligako txapeldun izateko. Dena dago jokoan.