Iraolak dio biharko partida aukera ona dela egoerari buelta ematen hasteko

Ez du ondo hasi denboraldia Athleticek, ez Ligan, ez Europan. Horren jakitun dira talde zuri-gorriko jokalariak. Argi dute lehenbailehen hasi behar direla emaitza onak lortzen. Eta biharkoa aukera ona izan daiteke. «Poliki-poliki eman behar diogu buelta egoerari. Eta Malagaren aurkako partida aukera izan daiteke», azpimarratu zuen atzo Andoni Iraolak.

Athleticeko kapitainaren arabera, «ondo» legoke bihar ondo hastea, nerbioak saiheste aldera. Iraolak, hala ere, badaki Malaga ez dela nolanahiko aurkaria. «Bikain hasi du denboraldia, eta, gainera, abantaila txiki bat du, guk baino bi atseden egun gehiago izan baititu».

Lezamako prentsa aretotik pasatzen diren guztiei bezala, Iraolari ere Fernando Llorenteren egoeraren inguruan galdetu zioten kazetariek. Taldekide guztiek esandakoa errepikatu zuen kapitainak: «Oso jokalari garrantzitsua da guretzat».

Bestalde, Athleticeko zuzendaritza hasi da erabakitzen Javi Martinezen fitxaketagatik Bayern Munichek ordaindu dizkion 40 milioi euroekin zer egin. Hala, horietatik zati bat, zazpi milioi euro pasatxo, Bizkaiko Ogasunarekin duen zorra kitatzeko erabiliko du. Beste guztia oinarrizko futbolean inbertituko du. Beraz, ia ziurtzat eman daiteke Athleticek ez duela inor fitxatuko —hilaren 29ra arte du epea—.

Iribarren omenaldia bihar

Zuzendaritzak, era berean, zehaztu du jada noiz egingo dioten omenaldia Jose Angel Iribarri —50 urte bete dira Athleticekin debuta egin zuenetik— eta noiz egingo duen bazkide konpromisarioen ezohiko batzarra. Iribarri bihar egingo diote omenaldia, Malagaren aurkako partida hasi aurretik. Batzarra, berriz, urriaren 15ean izango da, Euskalduna jauregian. Azkenik, Athleticek 350 sarrera jarriko ditu salgai astelehenean datorren larunbatean 20:00etan Anoetan jokatuko den derbia ikusteko. San Mamesko txarteldegietan egongo dira salgai, 10:30etik aurrera, 50 eta 85 euro artean.