Iritsi dira, baina goizegi da

Asteazkenean ikusmin handia zegoen Baionako Jean Dauger zelaian. Fitxatutakoen zain aste askoan egon ondoren, Michel Cacouault eta Alain Aflelou buruzagitza bikote berriak fitxatutako izarrak bertatik bertara ikus zitzaketen zale xuri-urdinek. Munduko Kopa tarteko, Zeelanda Berrian egon dira azken asteetan Baionak fitxatutako jokalari esanguratsuenak. Asteazkenean izen handi horietako lehena iritsi zen Baionara: Neemia Tialata.

Zeelanda Berriko harroina jaioterrian egon da aste honetara arte. All Blacks-en selekziotik at zegoen, baina errugbi federazioarekin kontratupean zegoen artean. Selekzioaren erreserba taldean zegoen, ezusteren bat egonez gero edozein unetan selekzioan sartzeko zain. Munduko Kopa bukatu ondotik, bere betebeharrak bete ditu Tialatak, eta iritsi da jada Baionara.

Baionako zaleen komentarioak ez ziren falta izan harroin berria entrenamendu gunean ikustean: «Hori duk hori zezena!», zioen batek baino gehiagok pozez beterik. Egia da bere metro eta 87 zentimetro eta 130 kiloekin errespetua sortzen duela Tialatak. Sasoi hasiera txar baten ondoren, abiada berriaren irudia izan da Zeelanda Berriko harroina.

Tialataren ondotik, fitxatutako guztiak ilaran iristen ari dira. Ostegunean, Cedric Heymansen txanda izan zen; Frantziako selekzioarekin jokatzen aritu da. Eta gaur bertan iritsiko dira Mike Philips galesa eta Joe Rokocoko hegalekoa. Yoann Huget zigortuta dago, eta Mark Chisholm lesiotik osatzen ari da. Horiek bakarrik dira eskas Baionako taldea osatuta gelditzeko.

Miarritzen ere zorioneko daude zaleak. Agilera aldean fitxatutakorik ez, baina aspaldiko ezagunak itzuli dira. Frantziako selekzioarekin ekinean ari ziren bost jokalari garrantzitsu berreskuratu ditu Miarritzek: Barcella harroina, Hariñordoki kapitaina, Yachvili uztartze erdia, Lakafia hirugarren lerroa eta Traille gibelekoa. Horiek ere, Heymans selekzioko kidearekin batera, ostegunean iritsi ziren Miarritzera.

Ufada handia izanen da jokalari guztien etorrera, sailkapeneko azken eta azken-aurreko postuetan baitaude Miarritze eta Baiona. Hala ere, oraindik egun batzuk gehiago itxoin beharko dute Lapurdiko bi taldeetako zaleek. Heymans izan ezik, jokalari horietarik bakar bat ere ez dute zelairatuko Baionak eta Miarritzek. Oraindik goizegi da jokalari guztiei sondeo fisiko bat egiteko, eta taldekideekin uztartzeko. Daukatenarekin egin beharko dute, beraz, aurrera bi taldeek. Azaroaren 5eko derbiaren bezperan, azken postuetatik ateratzea izanen da bien helburua, hurrengo astekoa agoniaren derbia izan ez dadin.

Baiona, Perpinyaren zain

Baionak eta Perpinyak bazkalostean jokatuko duten partidak ikusmina piztu du. Kataluniarrak eta euskaldunak oso postura txarrean daude, sasoi hasieran haien helburua Heineken koparako sailkatzea bazen ere. Briven aise galdu ondotik (30-10), Baiona jaisteko postuetan sartu da. Usaian adarjotze eta parrandarako prest dauden baionar zaleen artean irri gutxi ageri da, eta tentsioa gora eta gora doa Baionak partidak galdu ahala.

Perpinya ez dago askoz hobeki. Azken bi partidetan 77 puntu jaso ditu, eta sailkapenean Baiona baino hobeki egon arren, Munduko Kopan dituen jokalarien falta nabaritzen ari da. Ziklo txarrean daude bi hamabostekoak, eta gaurko partidak itxia behar luke izan. Baionan, hala ere, berri on batzuk izan dira aste barruan, Da Ros, Lacroix eta Flavell jokatzeko moduan daudelako. Azken orduan, eta taldean bi egun bakarrik egin baditu ere, Baionak Heymans zelairatuko du. Gibeleko postua hartuko du frantziarrak. Baiona puntu premian dagoen seinale, dudarik gabe.

BAIONA-PERPINYA

Baiona. Lafond, Roumieu, Baiocco; Flavell, Boutaty; Puricelli edo Bernad, Baget (kap.), Haare; Gartzia, Boyet; O' Connor, Lacroix, Mazars, Gerber; Heymans.

Perpinya. Freshwater, Geli, Pulu; Alvarez-Kairelis, Olibeau; Perez (kap.), Tuilagi, Tonita; Boulogne, Laharraga; Plante, Cross, Hume, Sid; Porical.

Epailea. Laurent Cardona.

Lekua. Baionako Jean Dauger (17.000 ikusle).

Ordua. 14:15 (Rugby Plus).