Datorren larunbatean abiatuko da Lau t'erdiko Txapelketa, eta bertan hutsune nagusi bat izango da: Iker Irribarria. Aramako aurrelaria eskuko minez dago, eta ez du parte hartuko. Hala jakinarazi dute gaur goizean, Zarautzen (Gipuzkoa) egin den aurkezpenean. Aitor Mendizabalek hartuko du haren lekua.
Erabakita daude lehen kanporaketak, eta ondorengoak izango dira: Jaka-Victor, Retegi-Elezkano, Ezkurdia-Mendizabal eta Laso-Artola. Lehen bi kanporaketetako irabazleak A multzoan ariko dira final-laurdenetan. Bertan izango dira Olaizola eta Bengoetxea. Beste bi norgehiagoketan gailentzen direnek B multzoa osatuko dute, Altuna eta Urrutikoetxearekin batera.
Txapelketak, gainera, pilota hautatzaile berria izango du. Lan kontuak direla eta, Kepa Peñagarikanok hautatzaile izateko ardura utzi du, eta Martin Alustizak hartuko du haren lekua.
