Irujok eta Barriolak kostata irabazi diete Titini eta Merino II.ari (17-22)

Binakako Txapelketaren aurkezpenean bi bikotek bereganatu zuten arreta osoa, haien mailagatik: Irujok eta Barriolak, eta Olaizola II.ak eta Beroizek osatutakoak. Bi bikoteok jada jokatu dute txapelketako lehen partida, baita irabazi ere. Hori bai, egon da alderik bi bikoteek lortutako garaipenetan: Olaizola II.a-Beroizek aise irabazi zieten Berasaluze VIII.a-Albisuri herenegun Sestaon (10-22) eta Irujo-Barriolak ederki sufritu zuten atzo Iruñean Titin III.a-Merino II.a mendean hartzeko (17-22). Gaur eta bihar jokatuko dira lehen jardunaldiko beste bi partidak: gaur, Eibarren, Bengoetxea VI.a-Apraiz eta Arretxe II.a-Begino izango dira aurrez aurre; bihar berriz, Xala-Laskurainek eta Aritz Lasa-Zubietak neurtuko dituzte indarrak Tolosan.