Oso partida gogorra jokatu dute; 14-12 irabazten joan dira Albisu eta Artola. 14na berdinduta zeudenean, Artolak min hartu du eskuin eskuan —hatza atera du—, eta handik aurrera Irujok eta Rezustak menderatu dute partida. Izan ere, Artolak ezin zuen pilota eskuinez jo, eta, Albisuk lan ona egin duen arren, ez da nahikoa izan. Azkenean 22-16 irabazi dute Irujok eta Rezustak. Horrenbestez, Artola eta Albisu txapelketatik kanpo gelditu dira.
Orain, Bengoetxea eta Untoriaren kontra jokatuko dute Irujok eta Rezustak, eta irabazten duen bikotea finalera pasatuko da. Aimarren eta Urrutikoetxearen kontra jokatuko dute finala apirilaren 9an, Bilboko Bizkaia frontoian.
