Juan Martinez de Irujo eskuko minez dago eta ez du jokatuko ostiralean, binakako txapelketako partidan. Goizean eskuin eskuko minez esnatu da eta partida bertan behera uztea erabaki du. Bere ordez Altuna III.a ariko da Donostian, Ceciliorekin, Barriolaren ordez, Artola eta Albisuren aurka. Bigarren astez jarraian ordezkoekin osaturiko bikote bat egongo da: Altuna III.a-Cecilio.
Xala eta Mikel Beroiz, aldiz, txapelketara itzuliko dira. Iragan astean arazo fisikoen erruz jokatzeari uko egin ondoren, proba bana egin eta jokatzeko moduan daudela ikusi dute. Xalak hiru aste egin ditu geldirik gerriko lesio baten erruz, baina atsedenak mesede egin dio eta osatu da. Igandean jokatuko du, Mungian, Merino I.arekin, Berasaluze II.a eta Zubietaren aurka. Merino I.ak anaiaren ordez jokatuko du, Merino II.ak eskuko minez jarraitzen baitu.
Beroizek ere jokatuko du. Eskuak hobera egin dio eta jokatuko duela aurreratu du. Iruñean jokatuko du, larunbatean, Olaizola II.arekin, Bengoetxea VI.a eta Aretxabaletaren aurka.
Asteburuko azken zalantza Beñat Rezusta da. Bergarako atzelariak eskua nahiko justu du eta, ondo bidean, bihar, pilota aukeraketan, argitu beharko luke jokatuko duen ala ez. Astelehenean du partida, Tolosan.
