Itxako zain dago ABF ligako txapela noiz ospatu

Hasi da atzera kontua Itxakok ABF liga hirugarrenez jarraian irabaz dezan. Larunbatean izan daiteke eguna, Eldak Marina Parki irabazten ez badio. Bestela, datorren asteartean ere izan daiteke, Donostian, derbian berdinduz gero. Bestela, beste hiru aukera geratuko litzaizkioke oraindik Lizarrako taldeari. Nafarrek, behintzat, egin dituzte etxeko lanak, ondo egin ere. 32-27 irabazi zioten atzo Leoni, eta hamar puntu ateratzen dizkiote bigarren sailkatuari. Eldak bost partida jokatu behar ditu oraindik —Itxakok baino bat gehiago—, baina guztiak irabazita eta Itxakok guztiak galduta ere ez luke ziurtatuta izango titulua irabaztea. Horri guztiari zera gehitu beharko lioke: nafarrei hamabost gol baino gehiagoko aldeaz irabaztea; azken finean, miraria. Bitartean, larunbateko Txapeldunen Ligako partida du jada buruan Itxakok.