Itxakok eta Bera Berak derbia jokatuko dute gaur Lizarran

Itxakok eta Bera Berak derbia jokatuko dute gaur Lizarran, arratsaldeko 19:00etan. ABF ligako lehen postuan dira nafarrak, hamasei punturekin; Bera Bera, berriz, laugarrena da, 11 punturekin.Lehia bizikoa izanen da, beraz, gaurko norgehiagoka, Itxakok bere nagusitasuna berretsi nahiko duelako, eta Bera Berak nagusitasun hori zalantzan jartzeko asmoz aterako delako pistara, zalantzarik gabe.

Sailkapenean gora egiten jarraitu nahi dute gipuzkoarrek, eta, horretarako, punturen bat eskuratu beharko lukete derbian. Itxakok ez dio erraztasunik emanen horretarako Bera Berari. Puntu bakar bat ere ez du galdu nahi Lizarrako taldeak bere pistan, jakin badakielako hutsak garesti ordain daitezkeela sasoiaren azken txanpan. Sendo hasi zuen denboraldia Itxakok, gainera, eta are sendoago jarraitzen du.

Txapeldunen Ligan lortutako emaitzek, gainera, konfiantza handia eman diete jokalariei, lehen ligaxkako azken jardunaldian gertatzen dena gertatzen dela ere B multzoko lider amaituko baitu lehen ligaxka Lizarrako taldeak. Bigarren ligaxkan izanen dira nafarrak, aurreneko aldiz, eta hori gauza handia da taldearentzat. Bera Berak, ondorioz, gogoz eta indarrez betetako talde bati egin beharko dio gaur aurre.

San Antonio, Errekopari begira

Asobal ligan, bertzalde, Torrevellaren pistan ariko da Amaya Sport San Antonio gaur (20:45), asteburuan Europako Errekopako final-hamaseirenetako bi partidak jokatuko baititu, biak Iruñean, Greziako Dukas taldearen aurka. Joanekoa ostiralean izanen da, 20:30ean, eta itzulikoa, berriz, igandean, 12:00etan.

Gaurko partidari dagokionez, Victor Alvarez ezin izanen da aritu, min hartuta baitago. Borraganek, Humetek eta Mindegiak arazo fisikoak dituzte, baina Torrevellaren aurka aritzeko moduan izanen dira. San Antonio ongi ari da, eta bolada onari jarraipena eman nahi dio Torrevellaren pistan, Errekopari ekin aurretik.