Itxakoren zain da Bera Bera

Bera Beraren eta Itxakoren arteko gaurko derbia izanen da ABF ligako hamabosgarren jardunaldiko partidarik interesgarriena (19:00etan, Bidebietan). Sailkapeneko lehendabiziko bi taldeak ariko dira nor baino nor gehiago. Itxako da liderra. Nagusitasun osoz, gainera. 28 puntu ditu, eta partida bakar bat ere ez du galdu. Bera Bera da bigarren, 23 punturekin. Gaur, beraz, tartea pixka bat murrizteko aukera izanen dute donostiarrek.

Bi taldeak une onean ailegatu dira gaurko derbira. Azken jardunaldian erraz hartu zuen mendean Bera Berak Kukullaga. Gora begira jarraitu nahi dute donostiarrek, puntu bakar bati ere ihes egiten utzi gabe. Nafarrek ere, noski, orain arteko bide beretik egin nahi dute aurrera. Bera Bera mendean hartzea urrats hagitz garrantzitsua izanen litzateke Ambros Martinen jokalarientzat, aurkari zuzena are atzerago utziko luketelako, batetik; eta bertzetik, garaipenak indarra emanen liekeelako asteburuko norgehiagokarako. Izan ere, Lizarrako taldeak Txapeldunen Ligako bigarren ligaxkari ekinen dio datorren larunbatean, Gyoriren aurka.

Etxean, sendo

Ligako lehen itzulian berdinketa lortzeko zorian izan zen Bera Bera Itxakoren pistan. 27-26 irabazi zuten, azkenean, nafarrek. Eider Rubiok penaltia jaurti, eta huts egin zuen azken segundoan. Bere pistan, hala ere, talde sendoa dela erakutsi du Donostiako taldeak orain arte. Itxakoren aurka ere beren jokoa egiten saiatuko dira Reyes Karrereren jokalariak; aurkariari gauzak zailtzen.

Karrerek Melinda Berta sartu ahal izanen du gaurko deialdian, osatu baita hegalekoa. Lehen itzuliko derbian, hain zuzen, jokalari hagitz eraginkorra izan zen Berta. Orkatila bihurritu zuen Murtziaren aurkako partidan, baina gaur jokatzeko moduan izanen da.

Itxakok ongi daki Bera Beraren pista zailenetako bat dela. Ongi daki, halaber, han garaipen bat lortzeak liga bideratuta utziko duela. Aste garrantzitsua da hau Lizarrako taldearentzat, eta bere mailarik onena emateko prest dira Martinen jokalariak. Gaur garaipena lortzea pizgarri garrantzitsua izanen litzateke nafarrentzat. Ez dute aukera galdu nahi izanen.