Esku hutsik itzuliko da Reala Donostiara Madrildik, Real Madrilen kontra 5-1 galdu ostean. Zuriek ez dute areriorik izan lehen zatian, eta aurreneko 45 minutuetan erabakita utzi dute lehia, 4-0eko markagailuarekin. Ahul aritu dira defentsan txuri-urdinak, eta erraz aritu dira espainiarrak zelai erditik aurrera.
Hobeto aritu da Reala bigarren zatian, eta erasoko jokalariak gehiago sartu dira jokoan. Aukera ugari izan dituzte golak egiteko, eta Griezmannek sartu du Realaren gol bakarra, baloia atezainaren gainetik loratuta. Gehiago sartu ahal izan dituen arren, markagailua erabakita egon da uneoro.
Zazpigarren zen Reala jardunaldiaren hasieran, eta gainerako emaitzen zain egon beharko da postu horri eusteko. Datorren asteburuan ez da partidarik izango, eta hurrengo jardunaldian Celta izango du arerio Anoetan.
Zuzeneko kontakizuna:
92. min: Amaitu da partida. Lehen zatiak guztiz baldintzatu du lehia, aise jokatu baitu Real Madrilek. Txukunago aritu dira donostiarrak bigarren zatian, baina Bernabeutik punturik ateratzetik oso urrun.
85. min: Aukera argia izan du Griezmannek Realaren bigarrena egiteko. Kornerra atera du Realak, eta, ateari bizkarra emanda, buruz errematea egin du frantziarrak. Bakarrik zegoen, eta astia zuen buelta eman eta hankaz errematatzeko. Hurrengo jokaldian, Velak, hiru arerioren artean, jaurtiketa atera eta ozta-ozta bota du kanpora Diego Lopezek.
GOLA, 5-1: 76. minutuan sartu du Ronaldok bere hirugarrena eta madrildarren bosgarrena. Falta area ertzean, eta giza hesiaren gainetik bota du baloia. Mugitu ere ez da egin Bravo atezaina.
GOLA, 4-1: Realaren gola; Griezmannek, 61. minutuan. Vela eta Griezmann bera erasoan, sakonean pasea eman dio mexikarrak, eta bakarrik geratu da frantziarra Diego Lopezen aurrean. Baloia loratuta sareratu du. Lehenago, Carlos Martinezek zelaia utzi du eta Ansotegik ordezkatu du. Arbeloak sarrera itxusia egin dio atzetik nafarrari.
52. min: Seriotasun handiagoarekin hasi du bigarren zatian Realak, erasora. Velak kanpora jaurti du area ertzetik, baina Diego Lopezek ez du lan handirik izan oraingoz. Hala ere, erritmoa jaitsi du Real Madrilek ere.
Atsedenaldia. Hamar minutu iraun dio kemenak Realari. Txukun aritu da tarte horretan, baina Real Madrilek lehen gola egin ondoren ahul eta ideiarik gabe geratu dira txuri-urdinak. Aukerarik ez dute izan, eta zuriek baloia izan ahala iritsi dira golak.
GOLA, 4-0: 36. minutuan, defentsaren erditik egin dute jokaldia zuriek. Area ertzean baloia utzi dio Balek Khedirari, eta bakar-bakarrik jaurti du. Ezin burua altxa dabil Reala. Lehenago, txartel horia ikusi du Pepek, Velari eginiko sarrera batengatik.
GOLA, 3-0: 26. minutuan, hirugarrena zurientzat. Ronaldo area ertzean zela, jaurti eta lurrera botata zegoen Markelen eskuan eman du baloiak. Penaltia madrildarren alde, eta erdi-erditik sartu du hirugarrena Ronaldok.
GOLA, 2-0: Benzemak bigarrena madrildarrentzat 18. minutuan. Ezker hegaletik sartu da Ronaldo, pasea area ertzera eta zetorkion bezala jaurti du frantziarrak. Zutoin ondoan jarri du baloia. Defentsan ahul Reala.
GOLA, 1-0: Real Madrilen gola, Ronaldok, 12. minutuan. Benzema hegaletik, erdiratu eta bakarrik sartu da atzetik Ronaldo. Kontrolatu, eta eskubiz gurutzatuta jaurti du. Ezin izan du ezer egin Bravok. 1-0.
10. min: Lehen abisuak Real Madrilek. Cristiano Ronaldoren jaurtiketa bat langara joan da, eta korner bat izan du ondoren talde zuriak, ondoriorik gabe.
5. min: Ondo hasi du partida Realak, eta dagoeneko bi korner izan ditu alde. Aukera garbirik ez, ordea.
Realaren hamaikakoa: Bravo; C.Martinez, Mikel, Iñigo, Jose Angel; Markel, Elustondo, Xabi Prieto; Vela, Griezmann eta Seferovic.
Real Madrilen hamaikakoa: Diego Lopez; Carvajal, Pepe, Varane, Arbeloa; Khedira, X. Alonso, Modric; Bale, Benzema eta Cristiano Ronaldo.
