Ivanovicek pibot bat eskatu du, eta Will McDonalden hautagaitzak indarra hartu du

Pauso bat aurrera, eta bi atzera. Erritmo horretan ari da Caja Laboral Baskonia sasoi honetan, eta adibide onena, Valladoliden aurka emandako itxura kaskarra. Kolpe bakarrean Kopan erakutsitako hobekuntza harrika bota duen itxura txarra. Baskoniak Teletovicen mendekotasun handia erakutsi zuen, eta Lamperen kasuan oraindik asko geratzen zaiola antzeman zen. Dusko Ivanovic ernegatu samar mintzatu zen partidaren osteko prentsaurrekoan, eta ausart, pibot bat eskatu zion zuzendaritzari, mikrofono guztien aurrean: «Ez dugu saskiratzerik lortzen saskipean, eta ezin dugu horrela jarraitu».

Baskoniako zuzendaritza beste norabide batean ari zen taldea indartzeko lanean. Hegaleko baten bila ari zen, saskipea ondo hornitua zutelakoan, baina Ivanovicen eskaerek norabidea aldatu du. Pasa den astean Alan Anderson eta Drew Nicholas jaurtitzaileak zeuden solasaldi guztietan. Gaur, Will McDonald. Estatubatuarra Baskonian aritutakoa da, kluba eta entrenatzailea ezagutzen ditu, eta Ivanovicek estimu handia dio. Gaizki samar irten zen taldetik, soldata kontuak epaitegietan argituta, baina akordioa lortzeko gertu daudela dirudi.

McDonald Txinako Ligan aritu da orain arte, Fujian taldean. Herri hartako ligako zortzigarren postuan sailkatu zen, eta titulua lortzeko kanporaketak jokatzeko sailkatu. Fujian kanporatua izan zen lehen kanporaketa horretan, eta Will McDonald bere etorkizuna erabakitzeko libre da orain. Txinan sekulako batez bestekoak lortu ditu New Orleansen jaiotako pibotak: 28 puntu eta hamar errebote partidako.

Korolev entrenatzen hasi da

Donostian, aldiz, martxo bukaerarako espero zuten jokalari berria iritsi da: Iaroslav Korolev. Hegalekoari duela bost hilabete egin zioten ebakuntza belaunean, eta espero baino bizpahiru aste lehenago hasi da entrenatzen. Hilabete inguru beharko du sasoi puntu ona lortu eta kantxaratzeko.