Ezohikoa da Igeldoko Harria. Ez da laukizuzena, ezta borobila edo zilindrikoa ere. Harri irregularra da, eta horregatik, 134 kilo pisatzen badu ere, erronka bat da harri-jasotzaileentzat hura behin eta berriz jasotzea. 1992. urteaz geroztik, minutu batean nork altxaldi gehiago egin lehiatzen dira Donostiako Aste Nagusian. Lehen urteetan, Goenatxo izan zen jaun eta jabe. Izeta II.ak hartu zuen lekukoa. Aurten, lau izetatar ariko dira nor baino nor gehiago.
Urola Kostako Hitza izetatarren etxean izan da, Igeldoko Harria txapelketarako nola prestatzen diren ikusten. Aurreko astean argitaratu zuten erreportajea Arkupean gehigarrian. Urte guztian harria gordeta egoten denez, beste harri irregular batekin aritzen dira, denak elkarrekin. Bideoan ikus daitezkeenez, gainera, Jakes 5 urteko haurra ere hasia da harriak jasotzen, bost kilokoarekin. Adi entzuten ditu helduek egindako oharrak.
