Joaquim Rodriguezek (Katuxa) irabazi du Ibardinen gaur, Euskal Herriko Itzuliko 4. etapan, eta maillot horia ere lortu du. Samuel Sanchez gaur arteko liderra sartu da bigarren, bederatzi segundora. Hirugarren Sergio Luis Henao heldu da, hamabira. Laugarren Robert Kiserlovski, bera ere hamabira.
Etapan zehar ihesaldi batzuk izan ostean, faboritoen tropeltxoa buruan heldu da Ibardingo igoerako azken kilometrora. 400en bat metro falta zirela jo du erasoa Rodriguezek. Txirrindulariak banaka-banaka iritsi dira helmugara. Chris Horner eta Tony Martin, esaterako, 21 segundora heldu dira.
Sailkapen nagusian Sanchez bera dago bigarren, bederatzi segundora. Hirugarren Horner, 21era. Laugarren Kiserlovski, 24ra. Bosgarren Henao, 24ra. Martin 13., 33ra.
Itzuliko etapa bat azkeneko aldiz 1994an bukatu zen Ibardinen; Davide Cassanik irabazi zuen, eta ondoren Tony Rominger iritsi zen. Sei kilometroko igoera da —bukaera du gogorrena—, eta garai batean klasikoa zen Itzulian.
Bihar Bera-Oñati etapa izango da —hirugarren mailako hiru mendate eta bigarren mailako bi—, eta larunbatean amaituko da Euskal Herriko Itzulia, Oñatin, 18,9 kilometroko erlojupekoarekin.
