Joaquim Rodriguezek (Katuxa) irabazi du Italiako Giroko 10. etapa, gain batean, eta lidergoa ere lortu du. Kilometro bateko aldapa gogor bat zuten bukaeran, eta Katuxak lan ona egin du Rodriguezentzat —bigarren zegoen sailkapen nagusian, bederatzi segundora—. Segundo batzuetako aldea atera die tropeleko beste txirrindulari garrantzitsuenei. Bartosz Huzarski sartu da bigarren, bi segundora.
Aurtengo Euskal Herriko Itzulian bi etapa irabazi zituen; haietako bat, Ibardinen. Handik gutxira Fleche Wallonen nagusitu zen.
Miguel Minguez (Euskaltel-Euskadi) kilometro askoan ihes eginda egon da beste bost lagunekin. Helmugarako zazpi kilometro falta zirela harrapatu dituzte.
Sailkapen nagusian bigarren gaur arteko liderra dago: Ryder Hesjedal, 17 segundora. Hirugarren Paolo Tiralongo dago (32ra), laugarren Roman Kreuziger (52ra), bosgarren Beñat Intxausti (52ra), seigarren Ivan Basso (57ra).
Bihar korrituko dute 11. etapa: Assisi-Montecatini Terme (255 kilometro). Hirugarren eta laugarren mailako mendate bana izango dituzte.
Orain arteko etapak
- 1. etapa: Herning-Herning. Irabazlea: Taylor Phinney. Liderra: Taylor Phinney.
- 2. etapa: Herning-Herning. Irabazlea: Mark Cavendish. Liderra: Taylor Phinney.
- 3. etapa: Horsens-Horsens. Irabazlea: Matthew Goss. Liderra: Taylor Phinney.
- 4. etapa: Verona-Verona. Irabazlea: Garmin taldea. Liderra: Ramunas Navardauskas.
- 5. etapa: Modena-Fano. Irabazlea: Mark Cavendish. Liderra: Ramunas Navardauskas.
- 6. etapa: Urbino-Porto Sant'Elpidio. Irabazlea: Miguel Angel Rubiano. Liderra: Adriano Malori.
- 7. etapa: Recanati-Rocca di Cambio. Irabazlea: Paolo Tiralongo. Liderra: Ryder Hesjedal.
- 8. etapa: Sulmona-Laceno. Irabazlea: Domenico Pozzovivo. Liderra: Ryder Hesjedal.
- 9. etapa: San Giorgio Nel Sannio-Frosinone. Irabazlea: Francisco Ventoso. Liderra: R. Hesjedal.
- 10. etapa: Civitavecchia-Assisi. Irabazlea: Joaquim Rodriguez. Liderra: Joaquim Rodriguez.
