Jokalariek eta jabeek hitzezko akordioa lortuta, Gabonetan hasiko da NBA

Bukatu da NBAko lock-out-a. Hitzezko akordioa lortu dute taldeetako jabeek eta jokalariek. Hori guztia idatziz jarri eta sinatzeko egun batzuk beharko badira ere, bi aldeek esandakoak konpromiso nahikotzat jotzen dira greba bukatu dela esateko. Lehiaketa Eguberrietan hasiko da, Eguberri egunean hain zuzen ere, eta hiru partida handirekin: Boston Celtics-New York Knicks, Los Angeles Lakers-Chicago Bulls eta Miami Heat-Dallas Mavericks.

Ez da akordioaren nondik norakoen berri eman; baina, lehen zurrumurruek esan dutenez, jabeek %51-49 banaketa eskaini diete jokalariei diru sarreren banaketan. Aurreko negoziazio osoan eskaini ez zutena eta hausturaren arrazoi nagusia. Keinu hori ontzat jo dute jokalariek, eta akordioari baiezkoa eman diote, greban jarraitzea beraientzat ere kaltegarria zela onartuta. Jabeek ere bazekiten lehiaketarik gabe zorrak hazi eta hazi baino ez zirela egingo, eta bien beharrak ekarri du orain dela bi aste ia ezinezko ikusten zen adostasuna.

Lehen kalkuluen arabera, 66 partida izango ditu liga erregularrak, ohikoak baino 16 partida gutxiago. Ohi baino beteagoa egongo da egutegia, normalean Gabonetarako 25 partida baino gehiago jokatzen direlako. Hilabete eskas barru jarriko da munduko saskibaloi liga onenaren makineria astuna martxan. Datorren abenduaren 9an hasiko da denboraldi-aurrea, eta bi aste horietan hiruzpalau partida jokatuko dituzte taldeek. Epe berean egin beharko dituzte taldeek egoki ikusten dituzten fitxaketak, jokalari aldaketak eta, ondoren, partidak.

Itzulera masiboa

Lock-out-aren bukaerak berehalako eragina izango du Europara sasoiari eustera etorri diren NBAko jokalariengan. Astebete eskasean euren taldeetara bueltatzeko agindua jasoko dute, baina oraindik ezin da jakin noiz arte jokatu ahal izango duten Europan. Baskoniaren kasuan Kevin Seraphin da kaltetuena, taldea utzi beharko baitu. Zerrenda luze bateko lehena baino ez da izango.