Juaristik eta Olazarrek Sagardoaren Txapelari eutsi nahi diote

Juaristi eta Olazar iazko txapeldunek Oñatz eta San Miguelen aurka jokatuko dute bihar, Galarretan, Sagardoaren II. Torneoko finalean (16:00). Torneo luzeak neguko azken asteak girotu ditu Hernaniko pilotalekuan, eta bihar jakingo da txapeldunak nor diren. Juaristik eta Olazarrek jokaturiko lau partidak irabazi dituzte, eta eurak dira faborito. Oñatz eta San Miguel, berriz, finalerdietan Zeberio eta Zubizarretaren aurka ezustekoa eman ondoren sailkatu dira (40-33).

Bi bikote desberdin dira. Juaristi eta Olazarrena sendoa da, gutxi galdu eta elkar oso ondo hartu duena. Finalerdietan 40-29 irabazi zieten Etxeberria IV.a eta Etxeberria III.ari, partida osoan agindu ondoren. Oñatz eta San Miguelen a, berriz, gazteagoa da. Atzelaria zaildua dago, eta hark hartzen du piloteoaren zama. Alboan, Oñatzek 26 urterekin jokatuko du lehen finala. Lau urte daramatza erremonte koadro profesionalean, eta kidearen lana baliatzen saiatuko da.

Palan, berriz, gaur jokatuko da asteburuko jaialdia, Mungian (19:00). Buruz buruko munduko txapelketako finalerdietako ligaxkako azken jardunaldiko partidak jokatuko dira, eta Vladimir Lujanek eta Xabier Ibargaraik finalerako txartela izango dute jokoan. Biak atzelariak dira, eta ligaxkako partida bana galdu eta irabazi dute. Kubatarra buruz buruko txapeldun izandakoa da; Ibargaraik, berriz, ezustekoa eman du txapelketan. Irabazleak Pablo Fustoren aurka jokatuko du heldu den asteko finalean.