Aparteko jokorik gabe, emaitza ederra eskuratu dute zuri-gorriek Turinen kontra jokatutako partidan. Hamaikakoa nabarmen aldatu du Ernesto Valverde entrenatzaileak, eta hasieratik jarri ditu jokatzen Viguera eta Iñaki Williams, esaterako.
Apustua ezin hobeto atera zaio Valverderi lehen minutuetan, 9. minuturako aurre hartu baitute bizkaitarrek markagailuan. Hain zuzen, Williamsek egin du gola. Taldea bigun ibili da, ordea, atzeko lerroan, eta 18. minutuan egin du Maxi Lopezek berdinketaren gola, Aurtenetxeri aurre hartuta.
Maxi Lopezek berak abantaila eman dio etxeko taldeari atsedenaldira iritsi baino lehen. Turinek ere ez du joko erakustaldirik egin, baina ausart egin du gora tarteka. Gurpegik berdindu du markagailua 72. minutuan, Beñatek erdiratutako falta bat buruz errematatuta
Europako Ligako final hamaseirenetako joaneko partida zuen Athleticek Turinen, eta bina berdinduta, alde dauka kanporaketa; irabazteaz gain, nahikoa du San Mamesen hutsean edo bana berdintzea final zortzirenetara igarotzeko.
