Kilometro bakarra aski

Ibilbideen prestaketa lanetan jarri, eta Joaquim Rodriguezek (Katuxa) metro bakar bat ere ez lioke aldatuko Tirreno Adriatikoko atzoko etapa amaierari. Aldapa motza eta gogorra, erritmo aldaketa bortitzen bat egiteko aproposa. Jo zuten erasoa Wout Poelsek (Vacansoleil), Danilo Di Lucak (Acqua&Sapone), Michele Scarponik (Lampre), Christophe Riblonek (Ag2r) eta Domenico Pozzovivok (Colnago). Baina Offidako helmuga bidean kataluniarrak kilometro bakarrera mugatu zuen muturreko ahalegina. Haren neurrira egindakoa zen amaiera. Chris Hornerrek (RadioShack) jarraitzen du lider.

Gain-gainean dago Milan-San Remo klasiko handia, eta Tirreno Adriatikoko tropeleko txirrindulari garrantzitsu asko lasterketa hartara begira jarri ziren atzo. Italiako klasikoa gogoan, edo gaixoaldia tarteko, etxerako bidea hartu zuten, besteren artean, Philippe Gilbertek (BMC), Edvald Boasson Hagen (Sky), Mark Cavendishek, Bernhard Eiselek (Sky), Matthew Gossek (Greenedge), Lars Boomek eta Juanma Garate (Rabobank).

9,3 kilometroko erlojupekoa

Zirkuitu gisan, klasiko txiki baten ibilbidea zeukan etapak. Berehala sortu zen ihesaldia, zazpi lagunekoa. Bost minuturen aldea ere izan zuten, baina atzean kontrol lanerako zeuden Liquigas, Farnese, RadioShack, BMC, Lampre eta Katuxa. Errusiako taldeak Oscar Freire, Rodriguez eta Dani Moreno zeuzkan azken kolpea emateko, eta kataluniarrak dotore biribildu zuen taldearen apustua. Ponte delle Pietre azkenekoz igotzen hasi zirenean harrapatu zuen tropelak ihesalditik egurrean jarraitzen zuen bikoa: Carlos Alberto Betancur (Acqua&Sapone) eta Serge Pauwels (Omega Pharma). Zalaparta sortu zuen horrek, baina Rodriguezek jo zuen azken kolpea.

Gaur amaituko da Tirreno Adriatikoa, 9,3 kilometroko erlojupeko batekin. Sei segundoko tartean daude Horner, Roman Kreuziger (Astana) eta Vincenzo Nibali (Liquigas).