Knicks-Nets, Hudson ibaiko borroka

Superman Howard bereganatzeko lasterketak erakarri du arreta handiena, baina New Yorkeko bi taldeen arteko borrokak ere milaka prentsa orri bete ditu, eta irrati uhinak dantzan jarri ditu. New Yorken gertatzen den orok oihartzun mediatiko ikaragarria duelako, eta Howardek berak Brooklyn Nets taldean jokatzeko eskaera egin ziolako bere talde ohiari, Orlandori. Nets taldeko Mikhail Prokhorov jabea, ordea, nekatu egin zen Orlandoren zain egoten, eta beste pieza batzuk mugitu zituen.

Joe Johnson agente librea fitxatu du, eta Deron Williams joko antolatzaileak hainbatetan eskatu zuen All Star-a lotu. Prokhorovek taldea New Jerseytik Brooklynera eraman du, inguru hartan zale kopuru handiagoa bilduko duelakoan. Ez alferrik, Brooklyn da New York hiriko konderri populatuena. Gerald Wallace, Brook Lopez, Kris Humphries, Marshoon Brooks, Andray Blatche eta Baskoniako kapitain ohia, Mirza Teletovic ariko dira Brooklynen, helburu bakar batekin: Manhattango bizilagunak menderatzea.

New York Knicks talde aberatsena, panpoxena izan delako betidanik. Madison Square Gardeneko palko garestienak Wall Street-eko negozio gizonen bilera gunea dira aspaldi, eta New Jersey Nets anaia pobrea izan da orain arte. Orain arte, Knickseko betiko zaleak nekatu samar daudelako talde urdinak urte batean bai, eta hurrengoan ere bai, lortzen dituen emaitza eskasekin. Carmelo Anthony, Amar'e Stoudemire eta Tyson Chandler hirukoak 65 milioi dolarreko soldata ikaragarria jasota ere.

Izar konstelazio horretan bere tokitxoa egiten saiatuko da Pablo Prigioni, NBAko rookie zaharrena, 35 urterekin. New York Knicksek jokalari askoren adina izan dezake zama astun. Kazetariek goitizena jarri diote jada taldeari: Jurassic Knicks. Bihar gauean jakingo da New York zaharra den, Brooklyn alternatiba serioa den, Brooklyngo Barclays Center pabiloian jokatuko baitute elkarren aurka.