Lagun Arok bere lehen garaipena lortu nahi du Estudiantesen aurka, Madrilen

Akats gehiago egiteko tartea bukatu zaio Lagun Arori. Jokatutako hiru partidak galdu ditu errenkadan, horietatik bi etxean, eta orain, zartaginari buelta eman beste erremediorik ez dauka. Bidea ezaguna da, Madrilen Estudiantes garaitzea. Bidea osatzea, lan erraza ez. Estudiantes ere ez dabilelako airoso. Ligako lehen norgehiagoka irabazi zuen, justu-justu Valentziaren aurka, baina hurrengo biak galdu zituen. Lehenengoa, Bartzelonan. Bigarrena, Fuenlabradan.

Estudiantesek ere presio handia dauka. Lagun Arok aurrea hartuko lioke garaipena kentzen badio, eta lehiaketa hasi eta berehala zulo sakonean sartzea, gauza txarra edonorentzat. Zaila da bi taldeetan zein den indartsuena gaur-gaurkoz. Egia da Estudiantesek partida bat behintzat irabazi duela, eta etxean jokatze hutsak balantza bere alde desorekatzen duela apur bat, baina Lagun Arorentzat garrantzitsuagoa da partida. Hurrengo bi jardunaldietan nahiko neurketa zailak jokatu beharko dituzte donostiarrek, CAI Zaragozan eta Valentzia Ilunben, eta komeni konfiantza emango dion garaipena lortzea.

Jimmy Baronen zain daude Donostia aldean. Haren punteria, haren puntuak botatzen dituzte faltan taldeak, eta berandu baino lehen, estatubatuarra bere onera bueltatzeko lanean ari dira. Babes hitzak entzun ditu aste honetan eskoltak, eta noizbait esnatuko dela pentsatu behar da. Pankorekin ez dago zalantzarik, sasoi puntu onean dagoelako, eta eskertzekoa litzateke Doblas eta Salgadoren ekarpena hobexeagoa izatea.

Estudiantesek jokalari interesgarriak ditu: Antoine Wright hegalekoa, adibidez. Bera da taldeko saskiratzaile onena, baina Cedric Simmons hegal-pibota eta Luis Flores eskolta ere arriskutsuak dira zirrikituren bat uzten bazaie. Bestelakoan, taldean jarraitzen dute Jayson Grangerrek, Daniel Clarkek eta German Gabrielek, besteak beste. Nabarmentzeko modukoa, Carlos Jimenezen itzulera.