Lagun Arok historia eta Cajasol ditu aurkari

Lagun Arok aurkari gaiztoa hartuko du Ilunben jokatuko duen lehen norgehiagokan: Cajasol. Sevillakoak 5. postuan sailkatu ziren joan den denboraldiko liga erregularrean, eta taldea nabarmen indartu dute. Louis Bullock, Katelynas eta Txemi Urtasun nafarra fitxatu dituzte kanpoko lerrorako, eta saskipean ere laguntza ona jasoko dute Triguerok eta Tariq Kirksayk, Kaloyan Ivanov eta Paul Davis bikoarekin. Sevillan jarraitzen dute Earl Calloway eta Tomas Satoranskyk ere.

Cajasolek oso gogor jokatzen du defentsan, eta erasoan adi jarduteko eskatu die Pablo Laso entrenatzaileak bere jokalariei. Partidako testuinguru txarrari garrantzia kendu zion Lasok. Izan ere, Cajasolek Ilunben jokatu dituen partida guztiak irabazi ditu, hiru denera, eta Lagun Arok ez du inoiz etxean jokatu duen lehen partida irabazi. «Datu horiei ezin zaie buelta eman, hori egia da, baina historia aldatzeko aukera daukagu, eta baliatzen ahalegindu behar dugu». Lasorentzat, gakoa Bullocken ekarpena murriztea izango da.