Bakar bat ere ez dago ziurtatuta oraindik, baina, behin-behinean, lau euskal herritar jarri dira Brasilgo Munduko Txapelketari begira: Xabi Alonso (Real Madril), Javi Martinez (Bayern Munich), Cesar Azpilikueta (Chelsea) eta Ander Iturraspe (Athletic). Vicente del Bosque Espainiako hautatzailearen 30 jokalariko zerrendan ageri dira laurak, baina horietatik 23 bakarrik joango dira Brasilera. Lehen hirurek nahikoa ziur daukate postua, baina, ondo bidean, Iturraspe, azkenean, zerrendatik kanpo geratuko dela dirudi. Didier Deschamps Frantziako hautatzaileak 20:00etan emango du zerrenda, eta litekeena da Stephane Ruffier atezain baionarra (Saint Etienne) bertan egotea.
Euskal herritarrez gain, euskal taldeetan ari diren hainbat jokalarik ere aukera izango dute Brasilera joateko. Haris Seferovic suitzarra (Reala) 23 jokalariko behin-betiko zerrendan dago; eta Raoul Loe kamerundarra (Osasuna) eta Liassine Cadamuro aljeriarra (Mallorcan ari da, Realak utzita) 30 jokalariko behin-behineko zerrendan sartu dira. Ondo bidean, Txileren zerrendan izango dira Claudio Bravo (Reala) eta Gato Silva (Osasuna), eta Frantziarenenan sartzeko aukera daukate Antoine Griezmannek (Reala) eta Aymeric Laportek (Athletic).
