Amaitu dira urrez blaitutako jokoak Simone Bilesentzat. Ezin zuten bestela amaitu, gainera: laugarren urrezko domina lortuta, gimnastika artistikoko lurreko proban nagusituta. Bilesek 15.966 puntu eskuratu ditu finalean, Alexandra Raisman herrikidearen (15.500) eta Amy Tinkler britainiarraren (14.933) aurretik.
19 urterekin, Riokoak aurreneko jokoak zituen Bilesek, eta bera izan da edizioko izar nagusietako bat. Michael Phelps eta Katie Ledecky igerilarien atzetik, Rion domina gehien bildu dituen kirolaria da. Barran lortutako brontzezko domina izan ezik, urrezkoak dira haren gainontzeko dominak ere: lehiaketa orokorrean, taldekakoan, jauzian eta lurreko proban.
