Lehen ligaxkako lanak amaitzeko aukera daukate gaur lau taldek

Txapeldunen Ligako lehen ligaxkako laugarren jardunaldia hasiko da gaur E, F, G eta H multzoetan, eta lau taldek etxeko lanak amaitzeko aukera ona daukate. Bayer Leverkusenek, Chelseak, Milanek eta Bartzelonak daukate aukera final-zortzirenetarako txartela eskuratu eta otsaila bitartean buru-belarri ligan aritzeko. Arsenalek eta Marseillako Olympiquek, berriz, oso urrats garrantzitsua egingo lukete, F multzoko partida irabaziz gero.

Talde onen eta oso onen arteko galbahea egiteko balio izaten du Txapeldunen Ligako lehen ligaxkak, eta talde apalenak bidean geratzeko zorian daude jada. E multzoan, Genk eta Valentzia daude larrien. Belgikarrek puntu bakarra daukate sailkapenean, eta Chelsea liderraren aurka ariko dira. Valentziak, berriz, irabazi beharra dauka Bayer Leverkusenen aurka, bestela Europako Ligari begira hasi beharko luketelako Unai Emeryren jokalariek.

F multzoan, bi talde horien antzeko egoeran daude Olympiakos eta Borussia Dortmund. Hiru puntu dauzkate greziarrek, eta bakarra alemaniarrek. Galtzen duena Europako Liga jokatzeko ere aukera gutxirekin geratuko da. Berdinketak biei egingo die kalte. E eta F multzoak baino argiago dago H multzoa, Bartzelona eta Milan zazpina punturekin daudelako. Irabazi ezean, aukerarik gabe geratuko dira BATE Borisov eta Viktoria Plzen. G multzoan, talde guztiek daukate oraindik aukera aurrera egiteko.