Lehen puntuen bila

Partida kaskarrak jokatzea baino hobe izaten da partida txukunak jokatzea, baina Osasunak ederki ikusi du denboraldiko lehen bi jardunaldietan itxura onak ez duela punturik ematen. Lehendabiziko jardunaldian, nafarrak ez ziren Deportivo baino okerrago aritu, baina 2-0 galdu zuten Riazorren. Bigarren jardunaldian, Bartzelona ahalguztiduna mendean hartuta eduki zuten minutu askoan, baina azkenean Messik bi gol sartu zituen hiru minutuan eta 1-2 galdu zuten gorritxoek. Itxura ona eman du Osasunak, baina puntu bakar bat ere ez du lortu trukean. Celta igo berriaren zelaian joera hori aldatzen saiatuko dira gorritxoak, itxura kaskarragoa eman arren golak sartzea eta puntuak batzea garrantzitsuagoa dela jakinda.

Liga hasiz gerotik jokatutako bi partiden ostean, lau talde soilik daude punturik batu gabe, eta horietako bi izango dira aurrez aurre gaur arratsaldean Balaidosen. Celtak,Osasunak edo biek puntu lehortea amaitzea lor dezakete, beraz. Vigon zein Iruñean azken egunetan puntu premiaz asko hitz egin bada ere, Jose Luis Mendilibarrek lasaitasun mezua hedatu nahi izan zuen atzo: «Erotuta geundeke, larrialdian gaudela eta Celtaren aurkakoa finala dela esaten hasiko bagina. Egia da gure burua sailkapeneko azken postuetan ikustea ez dela gozoa, baina batzuetan nola jokatu duzun eta zergatik irabazi ez duzun aintzat hartzea ere komenigarria da. Ezin dugu burua galdu».

Sasoia hasi besterik ez da egin eta hiru jardunaldiren ondoren punturik gabe egotea ez da ederra, baina, nolanahi, tragedia bat ere ez da. Hori bai, datorren asteburuan ez da liga jardunaldirik izango eta gaur arratsaldeko partida galtzen duenari luze egingo zaio hurrengo partidara arteko tartea. Hori saihesteko, gaur irabaztea bezalako konponbiderik ez da izango nafarrentzat.

Gorritxoen deialdiko berritasun bakarra Anthony Annanen sarrera da. Patxi Puñal zigortuta egongo da hurrengo partidetan, eta baliteke Schalke 04 taldetik utzita iritsitako euskarri afrikarrak Osasunaren elastikoarekin debuta egiteko aukera izatea Balaidosen. Annanek bi aste pasa baino ez daramatza Iruñean.

Celtaren zelaia, historiari erreparatuta, ez da aproposa izan Osasunarentzat, baina azken partidan gorritxoek irabazi egin zuten, eta Lehen Mailan Balaidosen lortutako lehen garaipena izan zen. Valdok eta Juanfranek sartu zituzten partida hartako bi golak, eta sasoi amaieran Celta Bigarren Mailara jaitsi zen.