Lehendabizikoz bi partida jarraian irabazteko aukera ona du gaur Osasunak

Osasunak sasoi honetan lehenbizizko bi partida jarraian irabazteko aukera ona du gaur etxean, Betisen aurka. Sailkapenean zazpigarren da, eta jokalari baikorrenak hasi dira Europaz hitz egiten. Baina horrelako egoeretan egin ohi du kale Osasunak, dena alde daukala dirudienean. Eta ametsa egia bihur daitekeela sinesten hasteko joera hori aldatzeko gai direla erakutsi behar dute Jose Luis Mendilibarren jokalariek.

Betis une zailean iritsiko da Nafarroako Erresumara. Azken bederatzi partidetan puntu bakarra batu ostean, Pepe Mel entrenatzailearen agurra izan daiteke gaurko norgehiagoka, baldin eta Osasuna menderatzen ez badute.

Partidaren atarian, Patxi Puñalek omenaldia jasoko du, gaur Osasunaren elastikoarekin Lehen Mailan gehien jokatu duen futbolaria bilakatuko baita Uharteko erdilaria. 351. partida izango du, eta Javier Castañedak zuen marka hobetuko du.