Lehiaketa Batzordeak bi partidako zigorra ezarri dio Asier Illarramendiri

Asier Illarramendik ez ditu jokatuko hurrengo bi partidak, Mallorca eta Athleticen aurkakoak. Espainiako Futbol Federazioko Lehiaketa Batzordeak bi partidako zigorra ezarri dio Realeko erdilariari, joan zen igandean Granadaren aurka jokatutako neurketan epaileak atera zion txartel gorriagatik. Fernando Teixeira Vitienesek Illarramendi kanporatu zuen lehen zatia amaitzear zela, Franco Jarari atzetik emandako ostikada bategatik.

Lehiaketa Batzordearen erabakiak ustekabean harrapatu ditu guztiak Realean. Izan ere, klubean bazuten Illarramendik zigorrik jasoko ez zuelako itxaropena. Horretarako, jokaldiaren irudiak igorri zizkioten Lehiaketa Batzordeari, epaileak ateratako txartel gorria gehiegizkoa izan zela argudiatuta. Lehiaketa Batzordeak, baina, ez du aintzat hartu Realaren eskaera. Are gehiago, txarrenean jarrita talde txuri-urdineko kideek espero zuten baino zigor handiagoa ezarri diote Illarramendiri —Roberto Navajas atezainen entrenatzaileari ere zigor bera jarri diote, epaileari protesta egiteagatik—. Aurkari batekin «bortizki jokatzea» leporatu diote. Reala ez dago inondik inora ados zigorrarekin, eta helegitea aurkeztuko du Apelazio Batzordean. Hala ere, oso zaila dirudi zigorra bertan behera uztea. Errazagoa dirudi zigorra partida batera jaistea. Hori gertatuz gero, Mutrikukoak derbia jokatu ahal izango du.

Ifran, min hartuta

Atzoko entrenamenduari dagokionez, Diego Ifranek ezkerreko orkatila bihurritu zuen, eta hurrengo egunetan jakingo da igandean Mallorcaren aurka jokatzeko moduan egongo den edo ez. Aldiz, Vadim Demidov, David Zurutuza eta Antoine Griezmann osatuta daude. Griezmannek atzo azpimarratu zuen zortzi gol sartu nahi dituela denboraldi honetan, orain arte sartutakoak baino bost gehiago. Iñigo Martinezek, berriz, aitortu zuen Mallorcaren «irrikaz» daudela, Kopako final-zortzirenetako itzuliko partidan gertatutakoagatik.