Imanolek aldaketa asko egin ditu hamaikakoan, eta ikusteko zegoen taldeak nola erantzungo zuen. Levanteren joko bizia izan da aurre egin beharreko froga, eta taldeak ez du sendo erantzuten jakin. Bisitariek hiru gol aukera sortu dituzte lehen 25 minutuetan, eta hirugarrenean, markagailuan aurreratzea lortu dute. Bardhik sartu du lehena. Remirorekin aurrez-aurre, balora ongi loratu du eta 0-1ekoa egin du.
Lehen zatia amaitu aurretik, aldea handitu du Levantek. Bardhi golegileak jaurtiketa ona egin du area kanpotik, baloiak langa jo du eta aldaratzea oinera joan zaio Mayorali. Realeko hiru jokalari inguruan ziren arren, azkar egin du errematea, eta Remiro gainditu du.
Bigarren zatia hasi denean, bi aldaketa egin ditu Imanolek. Willian Jose eta Portu zelairatu ditu, Le Normand eta Sangalliren ordez. Berdegunean sartu eta minutu batera, gola sartu du aurrelari brasildarrak. Ezkerretik eginiko erdiratze batek Levanteko jokalari baten eskuan jo du, balora penalti puntuaren inguruan gelditu da hilda, eta Willian Josek bira erdiko errematearekin sartu du 1-2koa.
Realak berdintzeko aukera izan du 72. minutuan. Portuk zutoinera bidali du ezkerrarekin egin duen jaurtiketa. Segidan, Oiartzabali heldu zaio aldaratzea, baina ez da baloia atera bideratzeko gai izan.
Minutu bat beranduago, azken aldaketa egin du Imanolek. Zaldua zelairatu du Gorosabelen ordez.
Azken minutuetan berdinketa bilatzeko ahalegina egin du Realak, baina Levantek eutsi egin dio, atzean ongi kokatuta, eta bisitariek eraman dituzte hiru puntuak Anoetatik.
Realak, beraz, ezin izan dio segida eman azken bi jardunaldietako bolada onari eta 19 punturekin geldituko da.
