Lisa Brennauer alemaniarra da munduko txapeldun berria emakumezkoen elite mailan. Estu-estua izan da saioa, minutuko aldearen barruan ibili direlako sei txirrindulari. Baina indarrak ondo neurtuta, behetik gorako saioa egin, eta alemaniarrak, azkenerako, nahikoa eroso irabazi du urrezko domina. 38.48 minutu behar izan ditu lanak amaitzeko. Hemezortzi segundo atera dizkio Anna Solovei ukrainarrari —zilarra—, eta 21 Evelyn Stevens estatubatuarrari —brontzea—. Eguraldiak ere eragina izan du, azken aldera euri zaparrada handia bota duelako, eta Linda Villumsem Zeelanda Berriko txirrindularia eta Ellen Van Dijk herbehereetarra izan ziren kaltetuenak, faboritoetako bi alegia.
Lourdes Oiarbide arabarrak saio ona egin du, eta 34. postuan amaitu du saioa, Brennauerrengandik 4.27 minutura. Gizonezkoen elite mailako erlojupekoaren txanda izango da bihar. Tony Martin alemaniarra da faborito argia. 14:48an abiatuko da Markel Irizar, eta 15:06an Jonathan Castroviejo. Tony Martin izango da abiatzen azkena, 15:36an.
