Josu Urrutia Athleticeko presidenteak agerraldia egin du gaur eta baieztatu du Fernando Llorentek taldea utzi nahi duela. Hala ere, Urrutiak adierazi du ez dutela jokalaririk saltzeko asmorik eta, beraz, Llorente fitxatu nahi duenak bere 36 milioi euroko desegite klausula ordaindu beharko du.
Aurrelariak 2013ko ekainera arte du kontratua talde zuri-gorriarekin. Abuztuaren 3an, hitzarmena berrituko ez zuela jakinarazi zion Llorentek zuzendaritzari. Presidentearen esanetan, arrazoiak ez dira ekonomikoak, beste txapelketan batzuetan parte hartu nahi du jokalariak. Kontratua berritzeko negoziaketak urtebete luzatu dira Urrutiaren arabera. Zifra ekonomikoen gainetik, taldearen filosofia babestu nahi dutela esan du eta Athleticek negoziorik egiteko helbururik ez duela gaineratu. Llorentek alde egitea kirolaren ikuspuntutik "negatiboa" dela nabarmendu du Urrutiak.
