Lotsagarri ez geratzea du helburu Arratek gaur Ciudad Realen

2008ko irailaren 27an galdu zuen azken aldiz Ciudad Realek partida bat Asobal ligan. Arrate izan zen Espainiako taldearen azken borreroa. 28-26 hartu zuen mendean, Ipuruan. Ordutik, baina, ez daki galtzea zer den Talant Duixebaevek zuzentzen duen taldeak. 58 partida jokatu ditu, eta guztiak irabazi. Marka ikusgarria.

Espainiarrek Ligan azken aldiz amore eman zuten egun horren bigarren urteurrena bete baino bi egun lehenago izango dira berriz ere aurrez aurre Ciudad Real eta Arrate. Partida ez da Ipuruan, Kixote Arenan baizik, Asobal ligako laugarren jardunaldian.

Ciudad Realen gauza gutxi aldatu dira ordutik: jokalari bikainez osatutako talde ia gaindiezina da oraindik. Arraten, ordea, gauza asko aldatu dira. Orain bi urte, talde polita zuen, kalitatekoa eta eskarmentuduna. Egun, aldiz, oso talde mugatua da. Eskarmentu gutxi du, eta, kalitateari dagokionez ere, nahiko justu dabil. Hori gutxi balitz bezala, sasoi honetarako fitxatutako hiru jokalariak min hartuta daude: Ivan Sever eta Bojan Beljanski pibotak eta Igor Petritxev erdikoa. Panorama horrekin, argi dago miraria litzatekeela Arratek gaur Ciudad Realen punturen bat lortzea. Ezusterik ezean, astindua jasoko du. Helburua, beraz, lotsagarri ez geratzea da. Hori lortzeko, Sergio Ciden ekarpena izango du, ezker hegalekoa osatu egin baita.



CIUDAD REAL-ARRATE

Txapelketa. Asobal ligako hirugarren jardunaldia.

Ciudad Real. Sterbik, Hombrados, Kallman, Guardiola, Evdokimov, Julen Aginagalde, Davis, Garcia Parrondo, Abalo,Plaza, Fernandez, Rodriguez, Cañellas, Jurkiewicz, Entrerrios, Morros, Dinart eta Lazarov.

Arrate. Voncina, Moiua, Cid, Iker Romero, Arrieta, Berrios, Altzaga, Szabo, Peña, Redei, Tokic, Kurilenko eta Petricevic.

Epaileak. Casado eta Vera.

Sailkapena. Ciudad Real hirugarrena da (lau puntu), eta Arrate, 11.a (puntu bat).

Lekua. Kixote Arena (5.200 ikusle).

Ordua. 18:30.