Luis Leon Sanchezek irabazi du Euskal Herriko itzuliko lehen etapa

Gaur hasi da Euskal Herriko Itzulia, Ataun-Ataun etaparekin (142,5 kilometro). Luis Leon Sanchez Caisse d'Epargneko txirrindulari espainiarra izan da lehenengo etapako garailea. 3.28.43ko denborarekin elastiko horia jantzi du eta sailkapen orokorrean lidergoan dago. Luis Leon Sanchez Paris-Nizako itzuliko garailea izan da, aurten. Bigarren Samuel Sanchez Euskaltel-Euskadi taldekoa izan da eta hirugarren Jerome Pineau Quick Step taldeko txirrindularia.

Lehenengo etapa azken unean erabaki da. Izan ere, lasterketa buruan hainbat ihesaldi ahalegin izan diren arren, inork ez du lortu helburu hori. Azken sprintean Leon Sanchezek aurre hartu die gainerakoei. Lasterketa buruan atzetik aurrera egin du eta azkenean itzuliko garaipena lortu du.

Lazkaomendirako igoeran lasterketa burua osatzen zuten txirrindularien tropela nahiko bateratuta joan da. Hala ere, igoera amaitu eta Zaldibiara iristeko aldapa behera hasi denean, Samuel Sanchezek jaitsiera azkarra egin du. Lampre taldeko Damiano Cunego italiarrak ere aurre hartzea lortu du jaitsieran.

13:30ak aldera ekin diote eta, besteak beste, Lazkao, Zumarraga, Oñati, Beasain, Ordizia eta Zaldibia herrietatik pasatuko dira gaur, atzera Ataunera iristeko.

Biharko etapa Ataun-Villatuerta izango da, 160 kilometrokoa. Hirugarren mailako lau mendate igoko dituzte, bigarren mailako bat eta lehen mailako bat (Lizarraga, 26. kilometroan).

Etziko epata: Villatuerta-Eibar (172,5 kilometro; Arrateko gainean bukatuko da). Ostegunekoa Eibar-Gueñes (161), ostiralekoa Gueñes-Zalla (169), larunbatekoa Zalla-Zalla (24 kilometroko erlojupekoa).

Alberto Contador da itzuliko faborito nagusia. Iaz berak irabazi zuen.