Lider sendorik gabe sartuko da Espainiako Vuelta zatirik gogorrenean. Christopher Froomek (Sky) ezustea eman zuen herenegun, erlojupeko bikaina egin eta liderraren maillot gorria jantzita. Baina Bradley Wigginsi (Sky) eta Vincenzo Nibaliri (Liquigas) begira daude denak. Gogorra doa Vuelta, baina igo beharreko 47 mendateetatik hamalau besterik ez dituzte igo oraindik. Manzaneda, Ancares, San Lorenzo, La Farrapona, Cordal, Angliru, Peña Cabarga... Gaurtik aurrera daukate paradisua igotzaileek.
Verinen hasi eta Manzaneda gainean amaituko da gaurko etapa, Galizian. Atsedenerako tarterik ez dago: Fumaces eta Ermida hirugarren mailakoak eta Gonza bigarren mailakoa igo beharko dituzte Manzaneda magalera iritsi aurretik. 19 kilometroko igoera da Manzaneda, eta %5,9ko batez besteko aldapa dauka. Hori bai, %16ko pareta bat ere badago tartean. Borrokarako gogoz daude igotzaileak, eta ikusgarria dator Vueltaren bigarren zati luzea.
Txirrindularitza. Espainiako Vuelta
Manzaneda lehen mailako mendate luzean amaituko da Vueltako gaurko etapa
Christopher Froome lider dela sartuko da lasterketa zatirik gogorrenean; igotzaileen eraso festa espero da
Iruzkinak
Ez dago iruzkinik
Ordenatu
