MARI LACRUZ. ATHLETICEKO ERDIKO ATZELARIA. «Emaitzek esango dute Liga luze egin zaigun»

Min hartuta zortzi hilabetean egon ostean, kolpea hartu zuen atzera belaun berean Osasunaren aurka. Berriz ere, gelditu egin behar. Jada osatu da eta hasi da taldean sartzen. Bere freskotasuna asko eskertuko du taldeak Ligako azken txanpan.

Porrot bat ahazteko sendagairik onena jokatzea omen da. Zuen onerako Ligak ez du etenik.@:UEFAn galdu ondoren onena jokatzea da, bai. Kolpe gogorra izan da UEFAn kanpoan gelditzea, baina heldutasuna erakutsi behar dugu aurrera egiteko.

Athleticek partida asko daramatza sasoi honetan. Taldea nekatuta al dago?@:Orain arte ahalegin handia egin behar izan dugu hiru lehiaketatan maila emateko. Taldeak oso ondo erantzun du, baina normala da sasoi hasierako freskotasunik ez edukitzea.

Ligako azken herena luzeegia egingo zaio Athletici?@:Emaitzek esango dute. Taldeak irabazten badu ez da ezer gertatuko eta galtzen hasten bagara aitzakia asko aurkituko dituzte.

Taldea nekatuta egon daiteke, baina zu ez. Oraintxe hasi zara jokatzen.@:Taldeari laguntzeko aukera daukat. Ilusio handia daukat.

Futbol gosea daukazu, beraz.@:Bai, duda barik.

Malaga izango duzue aurrean gaur. Entrenatzaile berriarekin beste talde bat dirudi.@:Oso bolada onean dago. Sadarren, zelai gaitz batean, sekulako emaitza lortu berri du. Gaitza izango da. Serio ekin beharko diogu partidari.

Entrenatzaile aldaketarekin bakarrik nola alda daiteke horrenbeste talde bat?@:Burua oso garrantzitsua da futbolean. Arlo horretan, oso garrantzi handia dute entrenatzaileek.

Malagaren gainean zer nabarmenduko zenuke?@:Azken urteotako ildo berean jarraitzen du. Espainiako hegoaldeko taldea izan arren, borrokalariak dira oso.

Non egon daiteke partidako gakoa? @:Serio jokatu behar dugu, atzean zein aurrean. Seriotasunean egongo da gakoa.

Klubak izena eman du Intertoto Kopa jokatzeko. Horrelakorik gerta ez dadin garrantzitsua litzateke Malagan irabaztea.@:Klubaren erabakia ustekabekoa izan da guretzat. Ligan ondo ari gara eta UEFAko postuetara dezente hurbil gaitezke irabazten badugu.