Ari dira Kutxabank Araski eta IDK Euskotren datorren denboraldirako taldeak egiten. Arabarrek kontratua berritu diote Maria Asurmendiri, eta gipuzkoarrek gauza bera egin dute Toch Sarrekin. Biek luzatu dute lanerako hitzarmena denboraldi baterako.
Asurmendi nafarrak bigarren sasoia beteko du Araskin. Maila bikaina eman du 34 urteko joko antolatzaileak aurreneko denboraldian: minutu gehien jokatu du, eta 9 puntu sartu, 2,5 errebote hartu, eta 2,7 asistentzia eman ditu. Hamabosgarren denboraldia beteko du liga nagusian. Asurmendi eta Anna Cruz fitxatu berria dira oraingoz datorren denboraldiko jokalari bakarrak.
Sarr ere asko aritua da elitean, eta hamargarren sasoia beteko du IDKn 36 urteko senegaldarrak, bi alditan banatuta. 2009an fitxatu zuen Donostiako taldeak Ferroletik, eta, bi denboraldi egin eta gero, Gironan aritu zen 2011tik 2013ra arte. Orduan itzuli zen oraingo taldera, eta han aritu da zazpi urte hauetan. 2.026 puntu sartu ditu, 1.018 errebote hartu, eta 529 asistentzia emateko gai izan da. IDK-k zortzi jokalari dauzka datorren sasoirako: Lara Gonzalez eta Joyce Cousseins-Smith joko antolatzaileak, Laura Garcia eta Mehryn Kraker eskoltak, Maria Eraunzetamurgil eta Julia Gladkova hegalekoak, eta Toch Sarr eta Meiya Tirera barruko jokalariak.
