Markel Irizar Radio Shack taldeko txirrindulariak (Oñati, 1980) irabazi du Andaluziako Itzulia, gaur, sailkapen nagusian Jurgen Van den Broeck-ekiko zeukan segundo baten aldeari eutsita.
Oscar Freirek eraman du etapa -bosgarrena-, esprintean. Samuel Sanchez (Euskaltel-Euskadi) geratu da bigarren gaur.
2004an hasi zen profesionaletan ibiltzen Irizar, Euskaltel-Euskadirekin. 2010etik Radio Shacken dago. Orain arte, garaipen bakarra zeukan: iaz Poitou-Charentes Itzulian irabazitako etapa bat. Andaluziakoa du, beraz, orain arteko garaipenik handiena. Behin Down Under Itzuliko mendiko maillota irabazi zuen, eta Paris-Niza batean erlojupekoan hirugarren izan zen.
2002an, afizionatuetan zela, barrabiletako minbizia izan zuen.
