Mediaprok 11,6 milioi euro ordaindu beharko dizkio Realari, Donostiako 6. Epaitegiak ebatzi duenez. Ebazpenean, epaitegiak dio komunikazio taldeak ez duela bete Realarekin zuen kontratua, eta "larri" urratu duela kontratu hori. Urratze horien truke zazpi milioi euro pagatzera behartu du auzitegiak Mediapro, eta bi hilabete pasatu baino lehen ordaindu beharko dio gainera. Hogei egun ditu Mediaprok helegitea jartzeko.
Zazpi milioi euro horiei gehitu behar zaizkie aurreko denboraldien irudi eskubideen truke Mediaprok Realari ordaindu ez zizkion 4,6 milioiak. Gainera, epaitegiak argitu du Realak bere partidak emateko eskubidea beste komunikazio talderen bati saltzeko aukera duela. Hain justu, Sogecableri saltzeagatik salatu zuen Mediaprok Reala, baina horretan ere epaileek arrazoia eman diote Realari.
