Azken asteetan ematen bazuen ere argentinarrak eta Joan Laporta Bartzelonako presidenteak akordio bat lortu behar zuela, azkenean ez da horrela izan. Atzo Bartzelonak jakinarazi zuen aurrelariak ez duela klubean jarraituko: «Bartzelonak eta Leo Messik akordioa lortu duten arren, eta bi aldeek beste kontratu bat sinatzeko asmo argia duten arren, ezin izango da formalizatu; oztopo ekonomikoak eta egiturazkoak direla eta (Espainiako Lehen Mailako araudia)».
Laportak gaur 11:00etan eman berri du prentsaurrekoa, egoera azaltzeko asmoz, eta behin eta berriz azpimarratu du «Messik klubean jarraitu nahi zuela». Hala ere, gaineratu du «inor ez» dagoela klubaren gainetik, «ezta Messi ere». Egoera horren erantzuleez ere hitz egin du Bartzelonako presidenteak, eta adierazi du herentzia negargarria» jaso dutela, aurreko zuzendaritza batzordeari erreferentzia eginez. Zuzendaritza batzordeari ez ezik, Espainiako Liga profesionalari ere leporatu dio kontua: «Liga ez da malgua epeak luzatzeko garaian».
Aro bat itxi du Lionel Messik. Argentinarrak arrasto luzea utzi du Bartzelonan. Klubean partida ofizial gehien jokatu dituen jokalaria da: 778 jokatu ditu; horietatik, 542 irabazi ditu, 142 berdindu, eta soilik 94 galdu. Horretaz gain, bere ibilbide profesionalean 669 gol sartu ditu, Kataluniako taldearekin. Aurrelariak 35 titulu lortu ditu; besteak beste, lau Txapeldunen Liga, hamar Espainiako Liga, eta zazpi Kopa. Taldearekin irabazi duenaz gain, bakarka ere hainbat sari eskuratuak ditu: sei Urrezko Baloi, sei Urrezko Bota, eta zortzi bider izan da Lehen Mailako golegile nagusia. Guztira, 17 denboraldi egin ditu Bartzelonan.
Haren etorkizuna ez dago argi; baina PSGk eta Manchester Cityk interesa erakutsi dute. Frantziako eta Ingalaterrako taldeek dute aukerarik handien Messi fitxatzeko. Hain justu, Ingalaterrako taldeko entrenatzailea Pep Guardiola da, eta litekeena da hark izatea giltza Messi konbentzitzeko.
