Miarritze bide ezin hobetik doa Heineken Kopako lehen astea bukatuta

Miarritze iragan sasoiko bidean dabil denboraldi honetako Heineken Kopan. Igandean jokatu zuten Jean Mixel Gonzalez eta JackIsaacen jokalariek ligaxkako lehen partida, eta emaitza borobila lortu dute. Ingalaterrako Bath taldearen kontra jokatu zuten lapurtarrek lehen partida, eta The Recreation Ground zelaian oso garaipen baliotsua lortu zuten (12-11). Garaipen horrek berebiziko garrantzia dauka, ingelesak multzoko lehen postua lortzeko faboritoak zirelako, miarriztarrekin batera.

Garaipen horrekin, dezente zaildu dio Miarritzek Batheri multzoko lehen postua lortzea. Arantza handia kendu dute Agilerakoek haien zangotik etxetik kanpo irabaziz, eta orain sailkapena lortzeko beste urrats bat egiteko parada dute. Izan ere, taldeburua Irlandako Ulster probintzia da, erraztasun handiz irabazi baitzion etxean Italiako Aironi taldeari (30-6). Erasoko puntu gehigarriari esker, puntu baten aldea dauka orain Ulsterrek(5 puntu) Miarritzeren aldean (4 puntu).

Preseski, igande honetan Irlandako taldea etorriko da Agilerara, multzoko bi taldeburuen arteko desafioa izanen den partidan. Miarriztarrek, irabazita, urrats berri bat eginen dute sailkapenaren bidean, Bath eta Ulsterri garaipen baten aldea aterakobaitiote. Partida horretarako, berriz ere, Dimitri Yachviliren ekarpena ederki estimatuko dute lapurtarrek. Uztartze erdiak sartu zituen Miarritzerenhamabi puntuak igandean, eta sekulako sasoia agertzen ari da. Agian, Europako uztartze erdi onena da liga hasiera honetan Yachvili.

Baiona ere fin

Baionak, bestalde, oso garaipen ona lortu zuen igandean, Londresko Harlequinsen kontra, Europako Challenge-aren kari (16-12). Sekulako euri zaparraden pean, baionarrek etxean ez zuten hutsik egin, eta partidaren zama eraman zuten, bi entsegu sartuz. Garaipen horrekin, urrats garrantzitsua egin dute xuri-urdinek final-laurdenetan sartzeko.