Miarritze lasaiago joanen da liderraren zelaira

Sasoi hasiera zailaren ondotik (Toulonen aurkako porrota, Gonzalez afera...), Miarritze koloreak berreskuratzen ari da. Etxean Tolosa eta Staderi irabazi zien aurrena, eta Arroxelaren zelaian etxean galdutako puntuak berreskuratu zituen hurrena. Neurri batean, etxeko lanak eginda dituela joan da Jean Mixel Gonzalez eta Jack Isaacen taldea Parisera, gaur Racingen aurka aritzeko.

Ez du lan erraza izanen Agilerako hamabostekoak, Racing taldeak sasoi hasiera honetan beldurra ematen baitu. Beldurra emateko moduko jokalariak ditu: Nallet, Qovu, Hernandez, Steyn, Bobo... Beldurra emateko moduko aurrekontua du, eta Pierre Berbizieren gidaritzapean, beldurra emateko sendotasuna erakutsi du orain arte.

Horiek ikusiz, ulertzekoa da Miarritzeko entrenatzaileek egindako hautua. Hasierako hamabostekoa ikusiz, taldeko liderrei atseden eman dietela ikus daiteke. «Talde sendoa daramagu Parisera, eta etxera puntuekin itzultzea da helburua». Jack Isaacekin aurkakoa errepikatu arren, zaila da hari sinestea. Hariñordoki, Yachvili, Balshaw, Lauret, Marconnet... ez dira guti hamabostetik kanpo dauden jokalariak.

Egia da Miarritzek egutegi zaila duela eta etxetik kanpo hiru aldiz jarraian jokatzea egokitzen zaiola. Arroxelan lana egin zuen, eta garaipena lortu. Hurrengo larunbatean Baionan euskal derbia jokatu beharko du, eta indar guztiak atxiki nahi ditu partida horri begira. horiek horrela, eta Racingi etxean irabaztea zein zaila den ikusiz, gaurko partida lasai hartzea erabaki du Miarritzek.

Hautua ez da bortxaz zozoa, baina tentuz ibili beharko du, hala ere. Izan ere, derbi baten aurretik astindua jasotzea ez da sekula ona, eta zelaian izanen diren jokalariek serio jokatu beharko dute. Lehenik, beharrezkoa den inplikazioa emanez gero, ongi prestatuko dute Baionaren derbia. Eta, azkenik, etorkizunean aukera gehiago izateko eskubidea lortuko dute arratsalde honetan partida ona jokatuta.



RACING MIARRITZE

Racing. Lo Cicero, Noirot, Tuugahala; Nallet (kapitaina), Van Der Merwe; Leo´O, Qovu, Battut; Durand, Wisniewski; Fall, Bergamasco, Chavancy, Bobo; Steyn.

Miarritze. Coetzee, Terrain, Johnstone; Thion (kapitaina), Carizza; Alexandre, Vahafolau, Faure; Aiestaran, Peyrelongue; Gobelet, Mignardi, Gimenez, Ngwenya; Bosch.

Lekua. Colombes (15.000 ikusle).

Orena. 14:30 (Rugby +).